शेतकऱ्यांना महाबीजचे सोयाबीन बियाणे उपलब्ध करून द्यावे..

मनसेचे कृषीमंत्र्या कडे निवेदन

उमरगा-लोहारा ता.०७
खरीप हंगाम सुरू होण्यापूर्वीच बाजारात महाबीजचे सोयाबीन बियाण्याचा तुटवडा निर्माण झाला आहे. विक्रेत्यांकडून सोयाबिन बियाणे उपलब्ध नसल्याचे सांगितले जात आहे. परिणामी शेतक-यांना खाजगी कंपनीचे महागडे बियाणे खरेदी करावे लागत आहे. शेतकऱ्यांना महाबीज कंपनीचे सोयाबिन बियाणे उपलब्ध करून दयावे अशी मागणी महाराष्ट्र नवनिर्माण सेनेच्या वतीने कृषी मंत्र्याकडे करण्यात आली आहे.

लोहारा तालुका महाराष्ट्र नवनिर्माण सेनेच्या वतीने कृषीमंत्री दादा भुसे यांना दिलेल्या निवेदनात म्हटले आहे की, मागील वर्षी सोयाबीन काढणीच्या वेळी झालेल्या अतिवृष्टीमुळे अनेक शेतक-यांचे सोयाबीन पाण्यात गेले तर उर्वरित अनेकांचे सोयाबीनला क-या आल्या होत्या. यामुळे शेतकऱ्यांकडे घरगुती सोयाबिन बियाणे उपलब्ध नाही. मागील सहा महिन्यांपासून सोयाबीनला चांगला दर मिळत असल्‍याने यंदा हे क्षेत्र बऱ्याच प्रमाणात वाढणे अपेक्षित आहे. खासगी कंपन्यांचे बियाणे दर मोठ्या प्रमाणात वाढलेले आहेत. खासगी कंपन्या व महाबीजच्या दरात मोठी तफावत असल्याने शेतकऱ्यांचा कल ‘महाबीज’च्या सोयाबीन बियाण्याकडे अधिक आहे. यामुळे लोहारा तालुक्यात महाबिजचे बियाणे उपलब्ध करून दयावे अशी मागणी करण्यात आली आहे. या निवेदनावर मनसेचे लोहारा तालुकाध्यक्ष अतुल जाधव यांची सही आहे.